Astrit Ajdarevic është bërë objektiv i disa skuadrave të njohura evropiane. Pas PSV Eindhovenit, së fundmi për mesfushorin kosovar ka shfaqur interesim edhe klubi tjetër holandez, gjiganti Ajax. Paraqitjet e shkëlqyeshme të tij në periudhën e fundit me Norrkopingun nuk kanë lënë pa u parë nga skuadrat holandeze.
Madje, Ajaxi thuhet se e ka dërguar një skaut për ta përcjellë më nga afër në ndeshjen me AIK-un në Rasunda. Po ashtu, atë e ka vëzhguar nga afër edhe skauti skandinav John Steen Olsen në derbi kundër Åtvidabergs. “Unë nuk komentoj për lojtarë individualë”, ka thënë Olsen për mediat suedeze.
Ndërkohë, Ajdarevic e pranon se dëshiron të rikthehet në një ligë të fortë evropiane. “Natyrisht, është një ëndërr për mua, ndoshta këtë e dini ju të gjithë”, deklaroi futbollisti prishtinas.
“Kam kaluar atje një kohë, kur pata nënshkruar me Liverpoolin, kur isha shumë i ri. Tash e di se si shkojnë gjërat. Por, derisa nuk ka diçka konkrete, do ta respektoj kontratën time me Norrkopingun. Nuk po mendoj shumë për të ardhmen. Gjëja e vetme është që të mund ta kontrolloj atë që e bëj në fushë”, shtoi ai.
Zyrtari i Norrkopingut, Tony Martinsson nuk ka dashur ta komentojë interesimin e klubeve për Ajdareviçin. Por, në Suedi konsiderojnë se Astriti është i gatshëm për një eksperiencë të re në një ligë më të fortë sesa ajo Allsvenskan.
