(E plotësuar)  Kryeministri i Kosovës Hashim Thaçi dhe Baronesha Ashton kanë nënshkruar marrëveshjen. Këtë e ka konfirmuar këshilltari i Kryeministrit, Bekim Qollaku. Ndërkaq së shpejti pritet edhe konfirmimi zyrtar i palës serbe.


Ndërkaq, Çitaku përmes rrjetit social Twitter ka shkruar : “Doli tymi i bardhë, kemi marrëveshje. E lumtur".


--------------


 Sekretari i përgjithshëm i NATO-s, Anders Fogh Rasmussen, do t’i takojë ndaras dy kryeministrat, Thaçi e Daçiq për të aritur një marrëveshje brenda ditës. Pritet që të diskutohet lidhur me qështjen e prezencës së FSK-së në pjesën veriore të Kosovës./Indeksonline/


----


Ka nisur takimi mes delegacionit të Kosovës dhe atij të Serbisë në zyrën e baroneshës Ashton.


Sipas RTK-së, marrëveshja pritet të arrihet deri në orën 15:00.


Ndërkaq Kryeministri Thaçi, pak para takimit ka thënë para gazetarëve se shpreson që raundi i dhjetë do të jetë përfundimtar për arritjen e marrëveshjes.


Në vijim e keni të plotë fjalimin e Thaçit, para gazetarëve:


"Ne përsëri kemi ardhur me qëllimin më të mirë që të arrijmë marrëveshjen mes Kosovës dhe Serbisë. Shpresoj që raundi i dhjetë do të jetë vendimtar për arritjen e kësaj marrëveshje të rëndësishme për dy vendet dhe popullin tanë. Gjithashtu shpresoj që Serbia ka reflektuar dhe sot do ta pranojë marrëveshjen në mënyrë që të pajtohemi në parim dhe të fillojmë fazat implementuese dhe akterët implementues të punojnë, në mënyrë që të kemi lëvizje të lirë të njerëzve dhe mallrave në veri, shpërbërjen e plotë të të gjitha strukturave ilegale serbe në veri, dhe të vazhdojmë me punën tonë për funksionalizimin e plotë të sistemit të drejtësisë dhe policisë sipas një sistemi unik kosovar.


Pra sistemi i drejtësisë dhe policisë do të jetë një sistem unik sipas ligjeve të Republikës së Kosovës. Ndërsa Asociacioni i komunave me shumicë serbe nuk do të ketë rol legjislativ, ekzekutiv apo të pushtetit të tretë. Dhe në anën tjetër do të krijojmë kushtet e përshtatshme që të organizojmë zgjedhje të para të lira në katër komuna në veri, dhe OSBE-do ta organizojë dhe lehtësojë këtë proces.


Kjo marrëveshje do të jetë në të mirë të Kosovës, në të mirë të Serbisë, të paqes dhe stabilitetit në rajon por edhe në të mirë të Bashkimit Evropian. Tani Kosova është njohur prej rreth 100 shteteve, është në proces të sigurtë për tu antarësuar edhe në NATO, në BE, dhe në OKB. Pra shpresoj në marrëveshje dhe Prishtina është gati të lëvizë drejt marrëveshjes. E ftoj publikisht Serbinë që të reflektojë. Faleminderit!"

----


Zëdhënësja e Baroneshës Ashton, Maja Kocijanciq ka njoftuar se Kryeministrat Thaçi dhe Daçiq, kanë arritur në ndërtesën e BE-së, dhe  takimi pritet të fillojë së shpejti.


“Delegacioni i Serbisë i udhëhequr nga Kryeministri Daçiq dhe ai i Kosovës i udhëhequr nga Kryeministri Thaçi tani kanë arritur në ndërtesën e BE-së, ku do të takohen me Përfaqësuesen e Lartë Ashton në kuadër të dialogut për normalizimin e marrëdhënieve ndërmjet Beogradit dhe Prishtinës”, ka thënë Kocijanciq.


Për dallim nga raundet tjera, kësaj radhe baronesha Ashton nuk do të zhvillojë takime bilaterale me palët, por menjëherë do të pasojë takimi i përbashkët.


Këtë e ka konfirmuar edhe Shefi i Diplomacisë kosovare, Enver Hoxhaj përmes profilit të tij në rrjetin social “Facebook”.


“Brenda pak minutava këtu në Bruksel fillon takimi mes dy delegacioneve. Serbia duhet të pranojë realitetin e shteteve të pavarura në Ballakan, duke përfshirë edhe Republikën e Kosovës. Me logjikën e së kaluarës, Ballkani Perendimorë ka humbur tri dekada, ne nuk kemi kohë për të humbur. Serbia duhet t’i thotë po marrëveshjes”, ka shkruar Hoxhaj.

---------


Në Bruksel rreth orës 12:00, pritet të fillojë raundi i dhjetë i bisedimeve Prishtinë–Beograd, në nivel kryeministrash


Koha Ditore në Bruksel ka pasur qasje në planin e marrëveshjes prej 15 pikave, që thuhet t’ua ketë propozuar palëve në takimin e fundit përfaqësuesja e lartë e BE-së për Politike të Jashtme dhe Siguri, Catherine Ashton.Këtë plan thuhet ta ketë pranuar pala kosovare, por jo edhe ajo e Serbisë, për shkak të pikës 14, e cila flet për mospendimin reciprok të anëtarësimit në organizatat ndërkombëtare. Këto janë elementet kryesore të këtyre 15 pikave të marrëveshjes.


1: “Bashkësi/Asociacion” të Komunave me shumicë serbe në Kosovë, e hapur edhe ndaj komunave të tjera, nëse anëtarët pajtohen.


2: “Bashkësia/Asociacioni” do të formohet me statut.


3: Strukturat do të formohen sipas të njëjtës bazë sikur edhe rajonet ekzistuese në Kosovë.


4: Kompetencat që do të jenë sipas Kartës evropiane të vetëqeverisjes lokale dhe sipas ligjeve të Kosovës.


5: “Bashkësia/Asociacioni” do të ushtrojë kompetenca shtesë ashtu siç i jep autoriteti qendror.


6: “Bashkësia/Asociacioni” do të ketë një rol përfaqësues në autoritetin qendror dhe do të ketë një ulëse në Këshillin konsultativë të komuniteteve.


7: Në Kosovë do të ketë vetëm një forcë policore, e cila do të quhet “Policia e Kosovës”.


8: Pika tetë sqaron se “e tërë policia në veri të Kosovës do të jetë e integruar në kornizën e Policisë së Kosovës” dhe se rrogat e policëve do të jenë vetëm nga Policia e Kosovës. Anëtarëve të strukturave të tjera serbe të sigurisë do t’u ofrohen pozita përkatëse në strukturat e Kosovës.


9: Për pikën e nëntë ka patur më së shumti dallime deri me tash. Sipas propozimit në tavolinë në këtë pikë saktësohet se do të ketë një postë të komandantit rajonal për komunat me shumicë serbe në veri të Kosovës dhe ai do të jetë një serb i Kosovës i zgjedhur nga Ministria e Brendshme e Kosovës nga një listë, të cilët do ta paraqesin.


Katër kryetarët e komunave në emër të “Bashkësisë/Asociacionit”, përbërja e Policisë së Kosovës në veri do të reflektojë strukturën etnike.


10: Sipas marrëveshjes së propozuar “autoritetet gjyqësore do të integriohen dhe punojnë në kuadër të sistemit ligjor të Kosovës. Gjykata e Apelit nga Prishtina do të themeloj një panel të përbërë nga gjykatësit serbë të Kosovës, të cilët do të merren me të gjitha komunat me shumicë serbe. Një njësi e kësaj Gjykate të Apelit do ta ketë selinë në pjesën veriore të Mitrovicës.


11: Zgjedhjet lokale në vitin 2013 do të zhvillohen me lehtësimin e OSBE-së dhe në përputhje me ligjet e Kosovës.


12: Kjo pikë flet për përpilimin e një plani të implementimit, i cili do të përmbante afate të sakta kohore, e që do të përpilohej deri me 26 prill. Në implementimin e kësaj marrëveshje do të bëhej kujdes edhe për transparencën e fondeve.


13: Siaps pikët 13 palët do të duhej të arrinin marrëveshje për energji dhe telekom para mesit të muajt qershor po të këtij viti.


14: Kjo pikë është më kontestuese në këtë moment, për të cilën Serbia edhe e ka refuzuar propozimin e fundit, që flet për anëtarësimin në organizatat ndërkombëtare. Sipas formulimit të tashëm kjo pikë thotë se palët pajtohen se asnjëra nuk do të bllokojë palën tjetër, apo të inkurajojë të tjetër që të bllokojnë kërkesat për anëtarësim në organizatat dhe forumet ndërkombëtare.


Burimet diplomatike pohojnë se do të ketë përpjekje dhe presion që kjo pikë të riformulohet dhe të flet për mosbllokimin e palëve në procesin e integrimeve evropiane.


15: Pika e fundit e propozim-marrëveshjes thotë se do të themelohet një komision implementues nga të dyja palët me një lehtësim të Bashkimit Evropian.


 


----


Delegacionet nga Kosova dhe nga Serbia, që po negociojnë për normalizimin e marrëdhënieve midis dy vendeve, tashmë ndodhen në Bruksel. Ndërsa ai i Kosovës, me në krye kryeministrin Hashim Thaçi, pas ftesës nga Baronesha Ashton, u kthye nga Lubjana, ai i Serbisë, siç njoftuan mediat e Beogradit, që mbrëmë ka udhëtuar drejt Brukselit.


Ata pritet të takohen në mesditë në raundin e dhjetë.


Raportuesit nga Brukseli përmendin mundësinë që marrëveshja të nënshkruhet në orën 15.


Në raundin e nëntë të bisedimeve Kosovë – Serbi, i cili kishte zgjatur rreth 14 orë, nuk u arrit marrëveshja e pritur dhe propozuar nga BE, ndonëse qe paralajmëruar se palët ishin shumë afër.


Palët ndërkohë fajësuan njëra tjetrën për dështimin. Ndërsa Daçiq theksoi se kryeministri i Kosovës po refuzonte marrëveshjen, duke futur në kuadër të saj çështje të papranueshme për Serbinë, si mospendimin e njëra tjetrës për anëtarësim në institucionet ndërkombëtare, përfshirë edhe OKB-në, Thaçi këtë kërkesë e arsyetoi të domosdoshme dhe në interes të të dy vendeve./Indeksonline/