Bashkia e Tiranës reagon pas akuzave të Partisë Demokratike, përfaqësues të së cilës thanë sot se do të kallëzojnë në Prokurorinë e Tiranës kryebashkiakun Erion Veliaj, për vendime të marra në dëm të qytetarëve dhe në shkelje të ligjit.Duke iu referuar mbledhjes së fundit të Këshillit Bashkiak, në të cilin u miratua edhe buxheti, Bashkia e Tiranës deklaron se buxheti i saj për vitin 2016 është më i madhi për këtë institucion dhe synon të zgjidhë një sërë problemesh, si investimet në shkolla, shtrirjen e rrjetit të transportit urban në të gjithë qytetin etj.
Në deklaratën për shtyp të Bashkisë Bashkisë së Tiranës thuhet se paketa e vitit 2016, ul taksat për biznesin e vogël si dhe për fermerët që punojnë tokën në pjesën rurale të qytetit.
"Fatkeqësisht, masat e guximshme të ndërmarra nga Bashkia e Tiranës u ndeshën me agresivitetin barbar të disa këshilltarëve të opozitës, të nxitur drejtpërdrejt nga njeriu që për 4 vjet e degradoi qytetin dhe iu fsheh si struci çdo vendimi të rëndësishëm për qytetin. Pasi për 4 vjet nuk i dha zgjidhje as këtij problemi, e as ndonjë gjëje tjetër sepse qytetin e drejtonte nga Holanda, tani tërbohet e nxit një gjuhë urrejtjeje kur sheh se zgjidhjet ishin të mundura, por Lulzim Basha s'pati kurrë guximin t'i ndërmarrë ato. Pastrimi i qytetit, ndriçimi e zbukurimi i tij, zgjidhja e transportit urban, çerdhet e riparuara, shkollat e reja, riparimi i rrugëve e trotuareve, janë provat e paaftësisë së tij, ndaj dhe ai i sul taborët e antiqytetarisë kundër zhvillimit të qytetit", thuhet në reagimin e bashkisë.
PD-ja padit Erion Veliajn
Partia Demokratike do të kallëzojë në Prokurorinë e Tiranës kryebashkiakun Erion Veliaj, për vendime të marra në dëm të qytetarëve dhe në shkelje të ligjit.
Në një dalje para medieve, anëtari i Këshillit Bashkiak të kryeqytetit, Fabian Topollaj, akuzoi Veliajn se në ditët e fundit të 2015-s mori vendime të paligjshme, nga nguti për të mbyllur menjëherë aferat e tij prej mijëra eurosh.
"Për nder të Veliajt, dita e fundvitit 2015 të shpallet dita e vjedhjes qeveritare. Pavarësisht se një hajdut me eksperiencë dhe gjakftohtë, nxitimi për të vjedhur edhe natën e Vitit të Ri ka bërë që aktet e datës 30 dhjetor të jenë absolutisht të pavlefshme", deklaroi Topollaj.
"Vendimi i Erion Veliajt për rritjen me 50 milionë dollarë të taksave vendore është i pavlefshëm, sepse është ndërmarrë pa u dekretuar ende ndryshimi i ligjit ?nga Presidenti i Republikës për taksat dhe tarifat vendore - vijoi këshilltari i djathtë -. Për të njëjtën arsye, fakti që bazohen në një akt që ende nuk ka fuqi është i pavlefshëm dhe miratimi i buxhetit të bashkisë për 2016-n. Afera korruptive për dhënien me koncesion të parkut 'Rinia' për 35 vite një klienti i cili do investojë 20 milionë dollarë për ndërtimin e parkingut për të fituar mbi 500 milionë dollarë sipas plan-biznesit, është e paligjshme sepse kontrata e miratuar është ajo që u la gati nga Rama dhe bazohet në ligjin e koncesioneve të vitit 2006 dhe jo 2013. Shpejtësia e miratimit të këtij koncesioni korruptiv ka bërë që të mos respektohen kërkesat bazike të ligjit në rastin e një procedure koncesionare. Vendimi i Veliajt marrë në mesnatë si një hajdut ordiner, për të rritur çmimin e biletave për qytetarët, është një tjetër aferë e pastër korruptive që do të çojë në xhepat e Veliajt dhe ortakëve të tij rreth gjashtë milionë dollarë çdo vit. Edhe ky akt është i pavlefshëm, sepse kaloi në Këshillin Bashkiak pa respektuar procedurën dhe afatet ligjore".Sipas Topollajt, Partia Demokratike është e vendosur t'i shkojë deri në fund betejës ligjore dhe qytetare për këto afera të pastra korruptive të ndërmarra nga Veliaj të cilat do të përkeqësonin edhe më tej jetën e qytetarëve.
