Prokuroria e Përgjithshme ka bërë bilancin e punës së saj në gjashtëmujorin e dytë të vitit 2015. Gjatë aktivitetit të kryer në gjashtë muajt e fundit, kanë përfunduar hetimet për disa skema mashtruese me vlerë përfitimi të paligjshëm dhe dëm ndaj shtetit në masën 60 milionë euro.Prokuroria njofton se ka vendosur nën sekuestro pasuri të luajtshme dhe të paluajtshme që arrijnë në një vlerë të përafërt prej 45 milionë eurosh.
Zyrtarisht, vitin e kaluar kanë nisur hetimet për 6 skema mashtrimit, ku kryeson ajo e DIA-s me një vlerë mashtrimi prej 10 milionë euro dhe çështja Bechetti me një vlerë prej 40 milionë euro.
Tjetër skemë mashtrimi ishte ajo e skandalit me rimbursimin e ilaçeve, me një dëm prej 2 milionë euro. Në krye të kësaj skeme dyshohet se është drejtuesi i një kompanie private farmaceutike dhe që ka përfshirë në hetime, zyrtare e ish zyrtare të Fondit të Kujdesit Shëndetësor dhe administratorë farmacish.
Prokuroria e Korçës zbuloi një tjetër skemë mashtrimit, me një dëm prej 1.5 milionë euro, në tregun e materialeve interte. Ndërsa në nëntor, prokuroria e Tiranës zbuloi aferën e shmangies së detyrimit ndaj shtetit për shitjen e aksioneve të kompanisë së naftës "Fullpet", me një vlerë prej 500 milionë lekësh të reja.
Në dhjetor, prokuroria e Fierit zbuloi një tjetër aferë në tregun e karburanteve, ku përgjegjës konsiderohet administratori i "Tea Oil", Adrian Xhillari. Vlera e shmangies së detyrimeve ndaj shtetit ishte rreth 2.5 milionë euro.
Një tjetër skemë mashtrimi është ajo në tregun e lojërave të fatit me një vlerë prej 1 milion eurosh. Për këtë janë arrestuar dy administratorë të një kompanie lojërash fati.
/ Shekulli Online /
