Deputeti i PD, Eduard Halimi, pas nje mbledhje te Komisionit te posacem per Reformen ne Drejtesi, ku jane votuar disa nene qe lidhen me detyrimet e Shqiperise pas anetaresimit ne BE./r/n/r/nLawmaker Eduard Halimi, after a meeting of the Committee on judicial reform.


Përfaqësuesi i Partisë Demokratike në qarkun e Beratit, Eduard Halimi, ka dorëzuar sot mandatin e deputetit. Në një postim të gjatë në Facebook, ish-deputeti demokrat tashmë, shkruan se do të nisë një projekt të ri ndërkombëtar network.


Sot kam dorëzuar mandatin e deputetit pasi nga nesër i përkushtohem një projekti të së drejtës ndërkombëtare private në një network në Ballkan, projekt që është afatgjatë dhe kërkon që vendimin ta marr sot, sqaron Halimi.


Halimi ka qenë një ndër zërat më të fortë opozitar porsa i përket çështjeve ligjore dhe ka kontribuar në përpilimin sa më të drejtë të ligjit të dekriminalizimit, që bëri pastrimin e Kuvendit nga eksponentë me të shkuar kriminale.


Halimi ka lindur në Korçë më 8 dhjetor 1972. Gjatë karrierës së tij si politikan ai ka mbajtur poste të rëndësishme, si sekretar i Komitetit për Çështje Ligjore të Parlamentit Shqiptar nga viti 2009 deri në korrik 2011.


Ai gjithashtu u emërua Ministër i Drejtësisë më 21 korrik 2011 dhe ka qenë anëtar i Këshillit të Lartë të Drejtësisë.


Vendin e tij si deputet në Parlamentin e Shqipërisë pritet që ta marrë ish-deputeti demokrat Astrit Veliaj, emri i të cilit ishte i dyti në listën rendore të PD për qarkun e Beratit.


Postimi i plotë në FB


Për mua ka qënë një privilegj të zgjidhem për të tretën herë deputet i Kuvendit të Shqipërisë. Gjatë këtyre viteve kam kontribuar më përkushtim të plotë në politikë si njeri i çështjeve të drejtësisë.


Sot kam dorëzuar mandatin e deputetit pasi nga nesër i përkushtohem një projekti të së drejtës ndërkombëtare private në një network në Ballkan, projekt që është afatgjatë dhe kërkon që vendimin ta marr sot.


Kam qënë një njeri me fat në këto vite sepse kam pasur në krah bashkëpuntorë të shkëlqyer, të përkushtuar e të ndershëm me kontributin e te cilëve arrita të lija gjurmë, por mbi të gjitha që kam dalë faqebardhë nga të gjithë detyrat që kam pasur. Me punën e tyre ata i hoqën mundësinë kundërshtarëve politikë të hidhnin ndaj meje dhe atyre, baltën e kudogjendur në politikë. Ndaj dua ti falenderoj ata të gjithë sot publikisht.


Dua të falenderoj Sali Berishën, që më dha mundësinë të kontriboj ne jetën politike të vendit në këto vite.


Falenderoj Lulzim Bashën, për besimin në detyrat politike prej 2013, për bashkëpunimin e shkëlqyer në këto vite dhe për mirëkuptimin në çdo vendim prej ditës së parë e deri më sot.


Falenderoj të gjithë kolegët e nderuar të grupit parlamentar për gjithë bashkëpunimin në këto vite në politikë.

Së bashku ne i bëmë një shërbim të madh vendit me paketën ligjore të dekriminalizimit dhe paketën kushtetuese të drejtësisë në 22 korrik 2016.


Falenderim dhe mirënjohje për gjithë votuesit e PD në qarkun e Durrësit dhe Beratit që më zgjodhën 3 herë deputet të Kuvendit. Kontributi im në Partinë Demokratike do të vijojë për gjatë gjithë jetës sime si një antar i thjeshtë dhe i përkushtuar.


Falenderim mediave dhe gazetarëve të palodhur për bashkëpunimin në këto vite.


Shihemi së shpejti në një hapësirë tjetër të rrjeteve sociale.


Ju faleminderit të gjithëve, Eduard Halimi


9 shkurt 2018 (gazeta-Shqip.com)