Ervin Premçi transferohet nga Bari pranë Interpolit në Lion, ndërsa Dritan Berisha dërgohet me detyrë në Itali

Pas lëvizjes së oficerit të kontaktit në Kosovë, ndryshime të tjera kanë pasuar në Itali dhe në Francë. Dy oficerë policie janë emëruar në postet e oficerit të kontaktit dhe më 1 korrik marrin detyrat e reja. Burimet policore shpjegojnë se Ervin Premçi, aktualisht oficer kontakti në Bari, është liruar nga kjo detyrë me urdhër të drejtorit të Përgjithshëm të Policisë së Shtetit, Hysni Burgaj. Lirimi i tij nga kjo detyrë është bërë për shkak të emërimit oficer kontakti në Lion të Francës. Premçi do të marrë detyrën e oficerit të kontaktit pranë qendrës së Interpol. Vendi i lënë i lirë nga Premçi do të zihet nga një tjetër oficer policie. Por, sipas të dhënave, në Itali do të bëhet një qendër më e madhe bashkëpunimi, kështu që ajo transferohet nga Bari në Romë. Në funksionin e oficerit të kontaktit në Romë do të emërohet Dritan Berisha. Vetëm pak ditë më parë u lirua nga detyra e oficerit të kontaktit në Kosovë Petrit Bushi. Ai u emërua në detyrën e shefit të Sektorit Kundër Korrupsionit në Drejtorinë Kundër Krimit Ekonomik të Drejtorisë së Përgjithshme të Policisë së Shtetit. Në vend të tij u emërua Astrit Kodra. Ky i fundit për pothuajse katër vjet ka mbajtur funksionin e kreut të Drejtorisë së Mbrojtjes së Dëshmitarëve. Burimet policore shpjeguan se këto lëvizje bëhen në kuadër të rritjes së bashkëpunimit me homologët e vendeve të tjera, pasi ka ndryshuar edhe shkalla e prioritetit ndaj tyre. Siç dihet, në varësi të drejtorit të Përgjithshëm të Policisë së Shtetit është krijuar Drejtoria e Bashkëpunimit dhe e Koordinimit Ndërkombëtar, që ka në varësi edhe Sektorin e Oficerëve Ndërlidhës.








#