Barcelona është favorit për ta mposhtur Real Madridin në finale të Copa del Rey, sipas sondazheve të mediumeve spanjolle. Dy rivalët historikë do të ndeshen mes vete më 20 prill, për të përcaktuar titullin e parë të sezonit. Ndërsa, sa i përket La Ligas, gjiganti katalan synon që me fitore ndaj Atletico Madridit të shtunën të shënojë rekord të ri prej 16 fitoreve të njëpasnjëshme në ligë.


Nga Express më 04 shkurt 2011 në ora 11:21

Barcelona është favorit për të mposhtur rivalin historik Real Madridin në finalen e Copa del Rey më 20 prill, në bazë të vlerësimit të sondazheve nga mediet spanjolle të enjten.



Të mërkurën, Barcelona kaloi në finale pas fitores 3-0 ndaj Almerias, ndërsa Reali mposhti Sevillan 2-0 në shtëpi. Një sondazh në ueb faqen e të përditshmes sportive madrilene Marca tregoi se 62.1 për qind e lexuesve – shumica prej të cilëve janë tifozë të Realit – mendojnë se Barcelona do të fitojë finalen.



Një sondazh i ngjashëm nga e përditshmja katalane Mundo Deportivo ishte edhe më i sigurt, jo më pak se 73 për qind e lexuesve identifikuan Barcelonën si favorit për të fituar kupën.



Dy gjigantët janë përballur pesë herë më parë në finalen e Kupës së Spanjës, ku Barcelona ka fituar tri herë, ndërsa Reali dy herë. Takimi i fundit në finale mes tyre ishte më 1990, kur Barcelona fitoi 2-0 në Valencia.



Reali nuk e ka fituar kupën nga 1993. Ende nuk është e ditur se ku do të zhvillohet finalja. Për kuriozitet, finalja do të vjen vetëm katër ditë pas përballjes së Realit dhe Barcelonës në La Liga në El Clasicon e dytë të këtij sezoni, më 16 prill në Madrid.



Në të parin, gjiganti katalan e shkatërroi atë madrilen duke e mposhtur 5-0 në Nou Camp. Barcelona aktualisht ka shtatë pikë më tepër se Reali në krye të La Ligas.




Barcelona synon rekordin e fitoreve në La Liga



Barcelona planifikon të shënojë rekord të ri në kampionatin spanjoll të shtunën, me 16 fitore të njëpasnjëshme, duke mposhtur Atletico Madridin në shtëpi. Ekipi në formë i Pep Guardiolas tashmë ka barazuar rekordin prej 15 fitoreve me radhë të vendosur nga Real Madridi në sezonin 1960/1961.



Tani ata janë të përqendruar të realizojnë një më tepër se ekipi i Alfredo Di Stefanos, Francisco Gento e të tjerët.



Sulmuesi David Villa tha: “Rekordi është me rëndësi për ne. Por, ajo që është edhe më me rëndësi është të vazhdojnë me fitore dhe formën e mirë që kemi aktualisht”.



Të mërkurën, Barcelona siguroi kalimin në finale të Copa del Rey me rezultat të përgjithshëm 8-0 ndaj Almerias në dy ndeshje.

Për dallim nga Barcelona, Atletico është në formë të tmerrshme dhe është mposhtur në tri ndeshjet e fundit.

Mirëpo, ai mbetet ekip i paparashikueshëm dhe çifti sulmues, Diego Forlan dhe Sergio Aguero, ka ditur t’i shkaktojë probleme Barcelonës në vitet e kaluara.