Milot-Balldren, një Bypass në lezhë, pjesë e koridorit blu, tenderim të Bypass-it të Fierit dhe Vlorës ku brenda datës 24 prill do të bëhet përzgjedhja e kontraktorëve të kualifikuar. Brenda verës të kemi lidhur kontratat.


Qeveria synon që të përfundojë brenda këtij mandati të gjitha akset kombëtare rrugore. Ambicia u njoftua nga ministri i Infrastrukturës, Damian Gjiknuri gjatë raportimit të punës për këtë gjashtëmujor para grupit parlamentar socialist.


Gjiknuri tha se aksi Qukës Qafë-Plloç kërkon 50 milionë dollarë të tjera dhe fajësoi për këtë projektin e dobët. Ndërkohë, 11 milionë euro të tjera do të shkojnë për pjesën e Rrugës së Kombit nga Kukësi në Morinë.


Janë projekte jo të mira, me ura që kanë disnivele. Edhe në Kukës-Morinë u nis me rrugët dhe u lanë për në fund urat. Do ta përfundojmë atë segment me 11 mln euro. Këto janë kosto të projektetve të menaxhuara keq të së kaluar, deklaroi ai.


Një tjetër aks problematik, afatet për përfundimin e të cilit janë vetë pa afate, është rruga Tiranë-Elbasan. Gjiknuri premtoi përmbylljen e këtij aksi brenda këtij viti, por që do të kërkojë 14 mln dollarë shtesë.


Kemi marrë konfirmim për financimin shtesë për pjesën e 14 mln dollarë që do të hidhen për të përfunduar segmentin nga zona e Ibës në Tunelin e Elbasanit. Brenda këtij viti edhe ai aks përfundon plotësisht, u shpreh ministri.


Sa i takon Rrugës së Arbrit, që do të ndërtohet sipas skemës partneritet publik-privat puna pritet që të nisë shumë shpejt.


Kontrata ka hyrë në fuqi. Para 3 ditësh kompania ka dorëzuar projektin e detajuar, u shpreh ministri.


Me financim nga buxheti Gjiknuri premtoi aksin Kardhiq-Delvinë dhe Unazën e Madhe në Tiranë, ndërsa tha se brenda këtij viti do të mbyllet puna për bypass-in e Fierit, ndërsa për atë të Vlorës tha se kërkohet më shumë kohë.