Policia Kufitare  ka goditur një tjetër rast të tentativës për trafik ndërkombëtar të lëndëve narkotike. Në Shkodër në pikën kufitare me Malin e Zi është zhvilluar operacioni i koduar Bukiviç, ku u sekuestruan 4 kg heroinë dhe 32 kg kanabis.


Policia thotë se janë shpallur në kërkim dy persona, që dyshohet se janë transportuesit e lëndës narkotike.


Nga shërbimet e Policisë Kufitare  të Drejtorisë Rajonale për Kufirin dhe Migracionin Shkodër, që patrullojnë në vijën e gjelbër  është marrë  informacion  në rrugë operative  se në vendin e quajtur “Bukoviç”, Njësia Administrative Kastrat, Malësi e Madhe, rreth 100-150m larg kufirit të gjelbër, dy shtetas  po transportonin lëndë narkotike në drejtim të Malit të Zi.


Shërbimet e Policisë Kufitare menjëherë janë vënë në ndjekje të tyre si dhe  kanë kërkuar mbështetje me forca të tjera ku është njoftuar edhe Sektori për Hetimin e Narkotikëve në Drejtorinë Vendore  të Policisë Shkodër.


Dy shtetasit që po transportonin lëndën narkotike sapo kanë diktuar se po ndiqeshin nga Policia  kanë braktisur lëndën narkotike dhe duke përfituar nga terreni i vështirë malor dhe me shkurre të dendura, kanë arritur ti shpëtojnë ndjekjes së  Policisë.


Grupi hetimor ka gjetur në vendngjarje  dy thasë ku brenda tyre kishte lëndë narkotike dhe pas peshimit rezultuan me peshë 32 kilogramë  Cannabis Sativa.


Gjithashtu në afërsi të thasëve u gjetën dhe dy qese  plastmasi me  lëndë narkotike, ku pas peshimit rezultuan 4 kilogramë 124 gr të llojit Heroinë, sqaron policia.


Specialistët për Hetimin e Narkotikëve në përfundim të veprimeve të para hetimore , bazuar edhe mbi bazën e informacioneve të marra në rrugë operative kanë shpallur në kërkim dy të rinj nga Shkodra ku për arsye hetimi nuk jepen të dhëna të mëtejshme.


Po vijon puna për  kapjen dhe  vënien e tyre para përgjegjësisë penale.


Materialet iu referuan Prokurorisë Krimeve të Rënda  Tiranë, për veprën penale “Trafikimi i narkotikëve”mbetur në tentativë dhe në bashkëpunim e parashikuar nga neni 283/a e 22 e 25 i Kodit Penal.



/Oranews.tv/


Të parët për lajmin e fundit. Ndiqni Oranews.tvFacebook dhe në Twitter