Persona të shumtë janë arrestuar në Iran pasi dyshohen për lidhje me
Shërbimin Persian të BBC-së, që është i ndaluar në këtë vend.



Agjencia e lajmeve “Mehr” deklaron se të arrestuarit ishin përfshirë në mbledhje informacionesh, duke rekrutuar dhe trajnuar persona të ndryshëm për gazetarë dhe kishin organizuar edhe udhëtime jashtë shtetit për ta.

Ndërkohë, BBC në një deklaratë për shtyp thotë se asnjë gazetar i Shërbimit Persian të saj nuk ka punuar brenda territorit iranian.

Në deklaratë thuhet se arrestimet duhet të përbëjnë një shqetësim të thellë për ata që besojnë në median e lirë dhe të pavarur.

Ditën e premte, BBC akuzoi autoritetet iraniane se po ushtronin presion ndaj stafit të Shërbimit Persian.

Në një blog, drejtori i përgjithshëm i BBC, Mark Thompson shkruante se korporata kishte konstatuar “taktika të reja shqetësuese”, mes të cilave sulmi i familjarëve të atyre që punonin jashtë Iranit.

Javën e kaluar, motra e një anëtari të stafit të BBC në persisht u arrestua dhe u mbajt në izolim në një burg të Teheranit.

Regjimi iranian akuzon BBC se ka nxitur protestat pas rizgjedhjes së diskutueshme të presidentit Mahmoud Ahmadinejad në vitin 2009. Gjithashtu, Teherani akuzon BBC se operon si një mbulesë e shërbimeve sekrete britanike.