all_about_himara_albanian_riviera-2441909560Falsifikimi i dokumenteve për 340 hektarë tokë në Himarë, Karaburun dhe Radhimë do të hetohet nga Prokuroria e Krimeve të Rënda pasi personat e përfshirë në këtë skemë janë pjesë e një grupi të strukturuar kriminal. Ky grup përbët nga zyrtarë lokalë, punonjës të gjykatave, hipotekës e biznesmenë.

Grupi i mafies së pronave në Vlorë tashmë do të hetohet nga Prokuroria e Krimeve të Rënda pasi është provuar se të gjithë personat nën hetim për falsifikimin e dokumenteve janë pjesë e një grupi të strukturuar kriminal.

Në përbërjen e këtij grupi sipas prokurorisë janë zyrtarë lokalë, të cilëve u janë ngarkuar detyra konkrete në lidhje me falsifikimin apo dhe regjistrimin e pasurive të paluajtshme, zyrtarë të punësuar pranë Gjykatës së Rrethit Gjyqësor Vlorë dhe pranë ZVRPP Vlorë.

"Rezulton se ky grup kriminal është krijuar me qëllimin e vetëm për të përfituar pasuri të paluajtshme në zonën bregdetare të qarkut të Vlorës, përmes falsifikimit të dokumenteve nëpër institucione të ndryshme shtetërore", thotë prokuroria në një njoftim shpërndarë ditën e djeshme.

Deri tani prokuroria ka marrë nën hetim 7 persona, përfshi ish-zyrtarë të Hipotekës së Vlorës, Gjykatës së këtij qyteti, por edhe biznesmenë apo persona që u është përdorur emri si përfitues të pronave me dokumente të falsifikuara.

Prokuroria thotë se tashmë do të jetë Prokuroria për Krime të Rënda e cila do të vijojë hetimet e nisura nga Prokuroria e Vlorës për tre raste falsifikimi dokumentesh.

Bëhet fjalë për troje me sipërfaqe totale rreth 340 hektarë dhe vlerë sipas çmimeve zyrtare rreth 240 milionë euro, të cilat tashmë janë nën sekuestro me vendim gjykate.

Nga hetimet e Prokurorisë së Vlorës, skema e falsifikimit të dokumentave në këto raste është realizuar nga i njëjti grup personash dhe ka krijuar dyshimet e arsyeshme se veprimet e kundërligjshme janë kryer në kuadër të grupit të strukturuar kriminal.

Për këtë arsye, Prokuroria e Vlorës ka shpallur moskompetencën, duke ia kaluar aktet Prokurorisë për Krime të Rënda, e cila është përgjegjëse për hetimin e veprave penale në kuadër të grupit të strukturuar kriminal.

Vijimi i hetimeve për këto raste nga Prokuroria për Krime të Rënda ishte temë kryesore e diskutimit të zhvilluar dy javë më parë në Vlorë, ndërmjet Prokurorit të Përgjithshëm edhe drejtuesve të Prokurorisë së Vlorës dhe Prokurorisë për Krime të Rënda.

Në bazë të analizës së përbashkët, u vlerësua që Prokuroria për Krime të Rënda të thellojë më tej hetimet e nisura nga Prokuroria e Vlorës, lidhur me këtë skemë të madhe falsifikimi dokumentash pronësie në zona turistike.

Prokuroria e Vlorës, në hetimet e zhvilluara gjatë tre muajve të fundit, ka zbuluar skemë fallsifikimi dokumentash dhe ka marrë lejen e gjykatës për sekuestrimin tre pasurive me vlerë 230 milion euro në Himarë, Karaburun dhe Zvërnec.

Nga hetimet janë krijuar dyshime të arsyeshme se, në të tre episodet janë të përfshirë shtetasit nën hetim Pullumb Petritaj, Enkes Hysendhima, Blerina Dhrami, Rajmond Mezi, Donika Besimaj, Lefter Gjergji dhe Belona Seraj, të cilët, në bashkëpunim mes tyre, kanë konsumuar elementët e veprave penale: "falsifikimi i dokumentave"; "shpërdorimi i detyrës" dhe "pastrimi i produkteve të veprës penale".

"Prokuroria e Vlorës ka provuar se personat e mësipërm, në bashkëpunim mes tyre për një periudhe të të gjatë kohore dhe në vijimësi kanë kryer më shumë se dy vepra penale. Nga mënyra se si janë kryer veprat penale, periudha kur janë kryer, rrethi i personave të përfshirë në kryerjen e këtyre veprave penale, vazhdimësia në kryerjen e veprave penale dhe qëllimi i përfitimeve materiale nga kryerja e veprave penale, rezulton se ky grup ka zhvilluar një formë të veçantë bashkëpunimi përbën grup të strukturuar kriminal", thotë prokuroria.

Për këto arsye nga ana e Prokurorisë së Vlorë, është vendosur shpallja e moskompetencës lëndore dhe kalimi i akteve për hetime të mëtejshme në Prokurorinë për Krime të Rënda, pasi rezulton se janë konsumuar elementët e veprës penale të "Grupit të strukturuar kriminal" dhe "Kryerjes së veprave penale nga organizata kriminale dhe grupi i strukturuar kriminal".

Të sekuestruara:

Në Palasë, Himarë, tokë me sipërfaqe 33 hektarë, në vlerë rreth 30 milionë euro

Në Karaburun, Vlorë, tokë me sipërfaqe 220 hektarë, me vlerë rreth 110 milionë euro

Në Zvërnec, Vlorë, tokë me sipërfaqe 89 hektarë, me vlerë rreth 100 milionë euro

Nën hetim:

Pullumb Petritaj

Enkes Hysendhima

Blerina Dhrami

Rajmond Mezi

Donika Besimaj

Lefter Gjergji

Belona Seraj