Partia LIBRA u shtohet qëndrimeve kundër kërkesës së PS-LSI për shtyrje të afatit të regjistrimit të koalicioneve në KQZ.


Përmes një deklarate për mediat, LIBRA thotë se nëse KQZ merr parasysh këtë kërkesë dëshmon edhe njëherë varësinë politike të këtij institucioni.


Të shtysh 18 prillin, thekson LIBRA, është njëlloj si të shtysh 18 qershorin.


LIBRA denoncon këtë tentativë, e cila sipas saj nuk bëhet për të përmirësuar standartet zgjedhore, por për të mbyllur llogaritë e koalicionit qeveritar, i cili po  saboton zgjedhjet me marrëveshje.


Deklarata e plotë


Dy partitë që qeverisin prej katër vitesh i kane kërkuar sot KQZ të ndryshojë afatet e rregjistrimit të koalicioneve zgjedhore.


LIBRA gjykon se kjo kërkesë, të cilën KQZ me sa duket do ta marrë parasysh, dëshmon për varësinë politike të këtij institucioni nga qeveria dhe cënon standartet zgjedhore pa nisur zgjedhjet.


Të shtysh afatin e rregjistrimit të koalicioneve pas datës 18 prill është njëlloj si të shtysh 18 qershorin.


Kjo kërkesë antiligjore, e cila i fut zgjedhjet në një rrugë të panjohur, nuk mund të ketë asnjë efekt, pasi KQZ nuk e ka tagrin të shtyjë një afat të përcaktuar në menyrë të qartë nga Kodi Zgjedhor i Republikës, i miratuar me 3/5 e Parlamentit.


LIBRA denoncon këtë tentativë, e cila nuk bëhet për të përmirësuar standartet zgjedhore, por për të mbyllur llogaritë e koalicionit qeveritar, i cili po  saboton zgjedhjet me marrëveshje.


Në kushtet kur vendi po mbetet pa President, pa Zgjedhje, pa Sistem Drejtësie, LIBRA e konsideron këtë akt një grusht shteti të partive në pushtet dhe të një partie në opozitë, të cilat po sabotojnë institucionet për shkak të korrupsionit, dhe frikës nga drejtësia.


Ne do bëjmë gjithcka që zgjedhjet të zhbllokohen, që shqiptarët të kenë nje President të mbështetur nga populli, që shqiptarët të kenë mundësi të zgjedhin të lirë duke rrëzuar kastën e tre partive të vjetra, të cilat nuk kanë aftësi ti afrojnë vendit stabilitet dhe progress.


 /Oranews.tv /


Të parët për lajmin e fundit. Ndiqni Oranews.tvFacebook dhe në Twitter