Kolegji i Posaçëm i Apelimit (KPA) ka lënë në fuqi vendimin e KPK për shkarkimin e ish-gjyqtarit të lartë Artan Zeneli, i cili kishte apeluar vendimin e Komisionit të Pavarur të Kualifikimit.


Në përfundim të gjykimit, mbështetur në faktet e provuara në gjykim dhe në nenin 66, pika 1, germa a të ligjit 84/2016, trupi gjykues i Kolegjit të Posaçëm të Apelimit vendosi unanimisht:



  1. Lënien në fuqi të vendimit nr. 41, datë 18.07.2018, të Komisionit të Pavarur të Kualifikimit që i përket subjektit të rivlerësimit Artan Zeneli.

  2. Ky vendim është përfundimtar dhe ka efekt të menjëhershëm.

  3. U shpall në Tiranë, sot, më datë 04.02.2018.


Seanca u zhvillua me dyer të mbyllura pasi gjykata e Vetting-ut pa në dhomën e këshillimt  kërkesën e gjyqtarit të cilit iu zbuluan probleme me pasuritë, por edhe papërshtatshmëri me detyrën, pasi i është refuzuar viza nga Ambasada Amerikane.


Trupi gjykues, i cili më herët ka vulosur vendime përjashtimi për gjyqtarë e prokurorë të pakonfirmuar, përbëhet nga ish-prokurorja e përgjithshme, Ina Rama, ish-anëtarja e Këshillit të Lartë të Drejtësisë (KLD), Albana Shtylla, kryetarja e Kolegjit të Posaçëm, Natasha Mulaj. Kryeson trupën Rezarta Schuetz dhe relaton Ardian Hajdari, por nuk mungojnë sërish as vëzhguesit ndërkombëtarë të ONM-së, të cilët po monitorojnë procesin. Por, ky muaj do të jetë i ngjeshur për shkallën e dytë të Vetting-ut, pasi është njoftuar seancë edhe për ish-gjyqtarin tjetër të lartë Shkëlzen Selimi, gjithashtu i shkarkuar pasi ONM zbuloi lidhjet e tij me krimin. Ndërsa javën tjetër KPA-ja do të trajtojë edhe ankesën e ish-gjyqtarit kushtetues Gani Dizdari.


Që prej nisjes së skanimit, Kolegji i Posaçëm i ka lënë në fuqi vendimet e shkarkimeve për 8 subjekte duke konfirmuar çdo gjetje të KPK-së. Në këtë mënyrë janë përjashtuar përfundimisht Besim Trezhnjeva, Besa Nikëhasani, Luan Kaloçi, Tom Ndreca, ish-gjyqtarët kushtetues Fatmir Hoxha, Altina Xhoxhaj, Fatos Lulo. Ajo që kuptohet nga këto vendime është se shkalla e dytë e Vetting-ut është e patundur në gjetjet e komisionerëve të kualifikimit dhe të Operacionit Ndërkombëtar të Monitorimit që zbuluan skandale në drejtësi që nga pasuritë e pajustifikuara e deri tek implikimi i gjyqtarëve me komponentë të krimit të organizuar.


Probleme të theksuara i dolën edhe Artan Zenelit jo vetëm për disa apartamente, por edhe për mënyrën se si ai kishte blerë një vilë në një zonë rezidenciale. Më herët, emri i Artan Zenelit doli në listën e zezë të Ambasadës Amerikane si një ndër gjyqtarët që i ishte refuzuar viza, një fakt për të cilin ju kërkua llogari dhe gjatë Vetting-ut.


Top Channel