Ditë të veçanta tetori në Zagrebin e mrekullueshëm që mirëpriti zonja të nderuara nga treva të ndryshme shqiptare në Ditët e Mbretëreshës Teutë, ku u mbajt Kuvendi Mbarëkombëtar, i organizuar nga Klubi i Grave të Kroacisë, me presidente Shenida Bilali. Kjo veprimtari ka 27 vjet jetë dhe vitet e fundit financohet nga shteti kroat, pasi në vizionin e vet ka historinë, kulturën dhe traditën shqiptare si pasuri, jo vetëm e shqipfolësve, por edhe e bashkëjetuesve të tyre.


Artistja dhe regjisorja, si edhe drejtuesja e kësaj veprimtarie, shprehet se e bën me art dhe atdhedashuri këtë punë dhe ndjehet e lumtur kur rrënjët ilire dhe mbretëreshën Teutë ia prezanton shtetit kroat ku ajo jeton dhe punon. Shenida e Teutave shqiptare ka rreth 27 vjet që promovon në Kroaci, këtë veprimtari  të konceptuar si  një marshim që nis nga Zagrebi për të vazhduar në Preshevë, Mal të Zi, Kosovë, Maqedoni e Shqipëri e pse jo në  Kalabri, Gjermani, Belgjikë, SHBA dhe Kanada.


Aktiviteti filloi me himnin e Teutës, kompozuar prej anëtares së shoqatës Mbretëresha Teutë, Ana Çupiç, kompozitore zagrebase, me prejardhje shqiptare, dhe vazhdoi me Monologun e Teutës që u interpretua nga artistja akademike e mirënjohur në Kroaci, Kostadinka Vellkovska.


Një moment tjetër i rëndësishëm ishte dhe prezantimi i Luçiana Martino, nga Kalabria, i kontributit të saj për arsimimin dhe përhapjen e gjuhës shqipe tek brezi i ri nga diaspora më e vjetër shqiptare 600-vjeçare.


Ndërkohë, me çmimin Mbretëresha Teuta 2017 u vlerësuan zonjat Dr.Ruki Kondaj (Kanada), Luçiana Martino (Kalabri), Lili Cingu (Shqipëri), ndërsa Çmimi Special është dhënë për nënën heroinë, Shpresa Sinani (Maqedoni) dhe Lajde Mjeda (Kroaci).