Me shumë gjasë ajo do të zgjidhet kryetare e Grupit Parlamentar të PD-së në Parlament, dhe emri i proklamohet në parim si kryetarja e opozitës së re.


Po flasim për Rudina Hajdarin, e cila me një vendim po aq ekstrem sa ai i Lulzim Bashës për të djegur mandatet e deputetëve të tij, e kundërshtoi liderin dhe qëndroi në Parlament për të vazhduar ti bëjë opozitës Edi Ramës.


Pas vendimit të saj, Rudinën e kemi parë në krahun e ambasadorit të BE Luigi Soreca, apo edhe në takim kokë më kokë me ambasadoren gjermane.


Padyshim që këto pamje tregojnë se ajo gëzon mbështetjen e faktorit ndërkombëtar, përkrahje që duket se është konfirmuar edhe sot, pasi e bija e Azem Hajdarit është takuar me një zyrtar të lartë të Departamentit Amerikan të Shtetit.


Zëvendës Ndihmës Sekretari i Përgjithshëm për Organizatat Ndërkombëtare, Jonathan Moore, ka diskutuar me Rudina Hajdarin rreth situatës së pazakontë politike në të cilën gjendet vendi ynë aktualisht dhe çuditërisht ska pasur një takim me kreun e opozitës Lulzim Basha.


Hajdari ka postuar foto nga takimi në Facebook dhe thekson se aktorët politik kanë përgjegjësinë që të angazhohen një orë e më parë në mënyrë serioze, të sinqertë dhe profesionale për të orientuar një zgjidhje politiko-institucionale afatgjatë për krizën.


Ajo shton më tej se synimi duhet të jetë gjetja e një zgjidhjeje që garanton në radhë të parë interesin e qytetarëve dhe të kombit për forcimin demokracisë dhe aspiratës Evropiane.


POSTIMI:


Sot zhvillova një takim me Z. Jonathan Moore, Zëvendës Ndihmës Sekretar i Përgjithshëm në Departamentin Amerikan të Shtetit për Organizatat Ndërkombëtare.


Departamenti Amerikan i Shtetit ka në vëmendje të veçantë situatën e pazakontë politike në të cilën gjendet vendi ynë aktualisht.


Shqipëria është prej më shumë se dy dekadash anëtare e Këshillit të Evropës, prej 10 vitesh anëtare me të drejta të plota e Aleancës së Atlantikut të Veriut dhe aspiron që së shpejti të jetë anëtare Bashkimit Evropian. Të gjithë ingredinetët diktojnë domosdoshmërinë për rivendosjen e rendit Kushtetues dhe Shtetit të së Drejtës.


Qytetarët Shqiptarë meritojnë dhe duhet të gëzojnë paqe sociale, rend dhe siguri, sundim të ligjit, politika afat-gjata zhvilluese, progres ekonomiko-social, integritet institucional, përgjegjshmëri dhe mirëqeverisje.


Shtetet e Bashkuara të Amerikës përfaqësojnë për çdo qytetar Shqiptar aleatët e bekuar të Shqipërisë që na janë gjendur pranë në sfida jetike të përmasave historike si engjull mbrojtës duke na udhëzuar në zgjidhje të dobishme dhe largëpamëse që nxjerrin faqebarrdhë Shqipërinë dhe qytetarët e saj.


Aktorët politik kanë përgjegjësinë e që të angazhohen një orë e më parë në mënyrë serioze, të sinqertë dhe profesionale për të orientuar një zgjidhje politiko-institucionale afatgjatë në frymën e Kushtetutës që të jetë e gjithëpranueshme për ti dhënë fund krizës së paprecedentë në cilën gjendet sot Shqipëria, me objektiv për të siguruar një zgjidhje që garanton në radhë të parë interesin e qytetarëve dhe të kombit për forcimin demokracisë dhe aspiratës Evropiane.