Në Francë e japin si të sigurt, Paul Pogba kërkon të largohet nga Manchester United. Madje, mesfushori i Djajve të Kuq ia ka shprehur hapur vullnetin e tij edhe drejtuesve të klubit. Destinacioni më i mundshëm Reali i Madridit.


Situata duket e qartë, madje edhe nëse United siguron pjesëmarrjen në Champions sezonin e ardhshëm, Pogba tashmë e ka bërë zgjedhjen e tij, të paktën siç raporton Le Parisien. Një tjetër faktor që e nxit largimin nga skuadra është edhe raporti me trajnerin Solskjaer, që thuhet se ka pësuar një krisje kohët e fundit.


Edhe norvegjezi riktheu mesfushorin francez të shkëlqente me 9 gola dhe 7 asiste në 19 ndeshje, raporti nuk është më si në fillim. Vetë mesfushori, pak javë më pare, lëshoi sinjale pozitive për një kalim të mundshëm te Los Blancos në përfundim të sezonit.


Zidane pritet të japë një ndihmesë të madhe në realizimin e këtij operacioni, me trajnerin që së bashku me presidentin Florentino Perez janë duke u përgatitur që të ndërtojnë një Real galaktik.


Transferimi do të bëhet konkret gjatë merkatos së verës, por marrëveshja mes lojtarit dhe klubit mbretëror mësohet se është arritur që tani.