Minatorët në pension protestuan sot para Kryeministrisë duke kërkuar hyrjen në fuqi të statusit të minatorit, i cili ka mbetur peng i ngërçeve institucionale edhe pse është premtuar për tu zbatuar nga qeveria,


Ata madje paralajmëruan intensifikimin e protestave, duke kërcënuar me grevë urie pa afat. Por pak orë pas tubimit të minatorëve ka reaguar ministria e Infrastrukturës dhe ajo e Financave, duke thënë se bashkë me sindikatën e minatorëve po punojnë për një draft të përbashkët, por ka ende minatorë që nuk e pranojnë dokumentin e propozuar.


Referuar protestës së zhvilluar gjatë ditës së sotme nga përfaqësues të sindikatave për çështjen e Statusit të Minatorit, Ministria e Infrastrukturës dhe Energjisë bashkë me Ministrinë e Financave dhe Ekonomisë sqaron opinionin publik se tanimë prej disa kohësh është funksional një grup ndërinstitucional pune i përbashkët që kryesohet nga zv.ministrat përkatës Enis Aliko dhe Dajna Sorensen, thuhet në deklaratën për mediat.


Sipas këtyre dy ministrive, ky grup pune ka zhvilluar diskutime intensive me përfaqësuesit e sindikatave, pjesa më e madhe e të cilëve janë dakordësuar mes tyre për një draft të cilin ja kanë paraqitur grupit të punës.


Fatkeqësisht, deri tani, ka dhe një pjesë përfaqësuesish sindikalë të cilët nuk kanë rënë dakord me draftin e propozuar nga pjesa kryesore e sindikalistëve. Gjejmë rastin që tu bëjmë thirrje të gjithë përfaqësuesve sindikalë që të bëhen pjesë e diskutimeve në tryezën e grupit të punës, të bashkohen në qëndrime mbi një draft të vetëm i cili më pas ti nënshtrohet procedurave të përcaktuara në ligj, thuhet deklaratë.


6 qershor 2018 (gazeta-Shqip.com)