Plani ishte i thjeshtë, por efikas: Të akuzosh një të moshuar për ngacmim seksual për ti marrë më pas para me anë të shantazhit.


Por jo gjithçka ka vajtur sipas planeve për dy shqiptarë.


Ngjarja


Një i moshuar 82 vjeç, shtetas italian e ka marrë me makinë një grua shqiptare të cilës i ishte prishur automjeti i saj dhe kishte mbetur në rrugë.


Në ditët e mëpasme, atij iu afruan dy shqiptarë të cilët e kanë akuzuar se ka ngacmuar seksualisht gruan e njërit prej tyre.


Dhe për të heshtur për ngjarjen i kanë bërë shantazh, duke i kërkuar në këmbim 5 mijë euro.


Por pensionisti nuk ka rënë pre e shantazhit dhe ka denoncuar gjithçka tek karabinierët, të cilët kanë organizuar takimin për dorëzimin e parave dhe kanë arrestuar në flagrancë dy shqiptarët Klevis Musta, 23 vjeç dhe Marsel Renja, 28 vjeç.


Shantazhi


Marsel Renja

Dy të rinjtë kanë shkuar pasditen e së premtes në shtëpinë e 82-vjeçarit në Chiaramonte, duke e akuzuar se kishte ngacmuar seksualisht gruan e njërit prej tyre dhe duke e kërcënuar që tu jepte sa më shpejt shumën cash prej 5 mijë eurosh, pasi në të kundërt do ta bënin të paguante.


Që nga ai moment, dy shqiptarët kanë nisur të përndjekin të moshuarin me telefonata me ton kërcënues, duke i kërkuar me insistim shumën e kërkuar, shkruajnë mediat italiane.


Pensionisti i është drejtuar karabinierëve, duke denoncuar dhe rrëfyer gjithë atë çfarë kishte kaluar dhe për çfarë e akuzonin.


Klevis Musta

82-vjeçari ka treguar se kishte shoqëruar me makinë një vajzë shqiptare që kishte mbetur në rrugë dhe menjëherë më pas ishte afruar nga dy djem që e kishin kërcënuar për të paguar shumë e parave duke i lënë edhe një vend takimi.


Pas denoncimit, karabinierët u kanë ngritur një kurth dy të rinjve shqiptarë në vendin ku ishte vendosur dhënia e parave.


Nga një autovetura kanë zbritur dy shqiptarët. Pasi kanë folur me viktimën, kanë marrë një zarf ku ndodheshin paratë. Karabinierët civilë të fshehur mes njerëzve kanë ndërhyrë befas dhe i kanë bllokuar duke rikuperuar edhe kartëmonedhash që vetë ata i kishin fotokopjuar për të provuar shkëmbimin.


Dy shqiptarët sipas mediave lokale janë pa precedentë penalë.


Ata janë dërguar në kazermë dhe pas procedurave rutinë do të dërgohen në burgun e Ragusas në pritje të gjykimit.