Veliaj: Bashkë me qeverinë do e kthejmë Piramidën në një shkollë alternative për teknologjinë e informacionit


Mbi 300 kompani nga i gjithë rajoni prezantuan praktikat më të mira, idetë dhe projektet inovative të tyre në Tiranë në fushën e start up-eve, turizëm, teknologji, sistemin bankar, energjetikë dhe telekomunikacion.


Për herë të parë në Tiranë u mbajt Festivali i Inovacionit, organizuar nga Bashkia e Tiranës dhe Dhoma e Tregtisë dhe Industrisë, që synon të nxisë ofrimin e ideve inovatore të kompanive të reja/Start-up në një format të vetëm dhe konkurrues, por dhe të investitorëve potencialë.


Kryebashkiaku i Tiranës, Erion Veliaj theksoi rëndësinë e zhvillimit të ideve inovative në funksion të rritjes së funksionalitetit të qytetit. Ai paraqiti disa nga projektet e Bashkisë së Tiranës që pritet të fillojnë së shpejti, si është transformimi i Piramidës në një nga qendrat më të mëdha të inovacionit dhe teknologjisë, artit e kulturës, në rajon. Bashkë me kryeministrin dhe qeverinë shqiptare, kemi vendosur që ndërtesën më ikonike të Tiranës, ta kthejmë në një shkollë alternative për 5 mijë të rinj çdo muaj, të cilët të mësojnë teknologji informacioni. Për sa kohë jemi të qartë që e ardhmja nuk është nesër, por tani, kjo që po ndodh, dhe nëse bashkojmë ata që krijojnë me ata që investojnë, mund të kemi një histori suksesi në Ballkan, tha kreu i Bashkisë.


Veliaj u shpreh entuziast për mbështetjen që ka gjetur te qeveria qëndrore për të filluar këtë projekt që në moshat e vogla. Si garanci për rëndësinë që kanë këto ide dhe projekte inovative, kreu i Bashkisë së Tiranës solli si shembull suksesi platformën Tirana Ime. Në një kohë kur kryeqyteti po ndryshon me ritme të shpejta dhe dinamike, nëpërmjet aplikacionit Tirana Ime, çdo qytetar mund të raportojë në kohë reale problematikat ose shqetësimet, papastërtitë, ose shkeljet që has në rrugë, dhe stafi i Bashkisë së Tiranës do të shqyrtojë çështjen pas marrjes së raportimit.


 


Pamë shumë bashki të cilat po eksperimentonin në mënyrën si përfshihen qytetarët, me forume dhe takime pafund. Po një qytet që sot ka 1 milion banorë nuk mund ti takosh të një milion vetët, ama secili prej tyre ka një celular në xhep me të cilin mund të komunikojë. Një aplikacion si Tirana Ime na jep rreth 20 mijë sinjalizime, denoncime, raportime të gjërave që nuk funksionojnë në qytet. Arritëm në përfundimin që më mirë sesa të punësonim 1000 inspektorë që vinin vërdallë duke tundur zinxhirin dhe merrnin 1000 rroga, më mirë ta bënim këtë proces open source, ku 20 mijë qytetarë raportojnë çdo ditë te një dispeçer që është i lidhur elektronikisht dhe na ka bërë që ato 1000 rroga ti kthejmë në 1000 mbushje gropash ose 1000 mbjellje pemësh, ose riparime shtyllash, theksoi Veliaj.


Një tjetër projekt i suksesshëm i cili është zbatuar nga bashkia është ai në fushën e  transportit, ku Tirana është qyteti i parë në Ballkan që ka sjellë sistemin e biçikletave pa stacion Smart Bike Share, një mënyrë ekologjike dhe inovative për të lëvizur në qytet. Kur filluam projektin e biçikletave njerëzit thanë: do ti vjedhin, do ti vandalizojnë. Thashë patjetër, por ka kudo. Kompania Mobike u tërhoq nga Manchesteri pasi 60% e biçikletave u vodhën dhe u vandalizuan. Vandalizmi në Tiranë është më pak se 15%. Pyetja është: A është inovacioni diçka që e përqafojmë? Dëshmia ime, të paktën në këtë copë të Ballkanit që administrojmë në Tiranë, është po! Ne e përqafojmë inovacionin, tha kryebashkiaku Veliaj.


Kreu i Dhomës së Tregtisë dhe Industrisë në Tiranë, Nikolin Jaka falenderoi Veliajn për mbështetjen e biznesit dhe të nismave të tilla. Ai theksoi se kjo energji dhe ky model suksesi duhet të transmetohet edhe tek njësitë e tjera vendore.


18 shtator 2018 (gazeta-Shqip.com)