Taksa e pronës për qytetarët e Tiranës nuk do të ndryshojë derisa të bëhet gati kadastra fiskale dhe të vendoset se cili operator do ta grumbullojë atë.



Deri atëherë, qytetarët do të vazhdojnë të paguajnë për pronën 100 lekë çdo muaj në faturën e ujësjellësit.


Taksa e re për pronën duhej të kishte nisur të paguhej që në 1 prill. Në mbledhjen e Këshilit Bashkiak të së enjtes u mor vendim që të mbetet në fuqi taksa e vjetër.


Derisa zona kadastrale të jetë gati dhe të vendoset se cili operator do ta mbledhë taksën, taksa të mbetet e pandryshuar derisa të ketë një vendimmarrje kombëtare, tha Veliaj.


Por, edhe kjo mbledhje, ashtu si ajo e muajit të kaluar, është zhvilluar pa praninë e këshilltarëve të djathtë. Ata janë larguar pasi konsiderojnë të pamandatuar 6 anëtarët e rinj që i janë bashkuar këtij këshilli.


Kreshnik Çollaku, kreu i grupit të këshilltarëve të djathtë, deklaroi: Në këtë sallë vazhdojnë që të kontrabandohen 6 individë pa mandat. Në këtë mënyrë, ju vazhdoni që të refuzoni njohjen e vendimit të Gjykatës së Tiranës, që e ka cilësuar si nul mandatin e tyre. Përbërja e këshillit është e paligjshme.


Por, edhe pse të djtahtët janë larguar, në këtë këshill u miratuan disa vendime të rëndësishme për qytetarët, si dhënia e ndihmës financiare për familje që janë përballur me fatkeqësi të ndryshme, plani i Tiranës së gjelbër si dhe rritja e pagave për edukatoret e çerdheve të Tiranës.


7 qershor 2018 (gazeta-Shqip.com)