Bashkimi Europian konfirmoi se ndërmjetësi Robert Cooper ka qëndruar të premten në Prishtinë. Zëvendëskryeministrja Edita Tahiri e mbajti të fshehur mysafirin e saj. Por ajo nuk hezitoi të elaborojë pozitivisht propozimin e tij që Kosova dhe Serbia të menaxhojnë bashkë kufirin. Negociatorja kosovare vazhdimisht ka mohuar se Brukseli po bën propozime gjatë kontakteve me palët.

Ndërmjetësi i Bashkimit Europian, Robert Cooper ka qëndruar fshehtas të premten në Prishtinë për të zhvilluar bisedime me palën kosovare, në përpjekje për të rifilluar procesin e bisedimeve Kosovë –Serbi.

Zyra e Zëvendëskryeministres Edita Tahiri, e cila udhëheq delegacionin e Prishtinës në bisedime me Beogradin nuk ka publikuar asgjë rreth vizitës së lehtësuesit Cooper në kryeqytet.

Kur britaniku vjen në Kosovë ai zakonisht takon Kryeministrin Hashim Thaçi dhe Zëvendëskryeministren Edita Tahiri.

“Nuk kemi diçka zyrtare për Cooper’in”, ka thënë Visar Xani, këshilltar i Zëvendëskryeministres në një përgjigje të shkurtër për Express.

Në këtë mënyrë, as nuk është mohuar, e as pohuar prezenca e Cooper’it në vend.

Por ardhja e Cooper’it është konfirmuar nga Zyra e Përfaqësueses së Lartë, Catherine Ashton.

“Robert Cooper është në Prishtinë për të bërë përgatitje rreth takimit të ardhshëm”, ka thënë zëdhënësi Michael Mann, në një prononcim elektronik për Express të premten.

Shkrimin e plotë mund ta lexoni në Express...